Azərbaycan Mətbuat Şurasında “Süni intellektin media sektoruna təsirləri” mövzusuna həsr olunmuş tədbir keçirilib.

Xəbər Experti xəbər verir ki, toplantını giriş nitqi ilə açan Mətbuat Şurasının rəhbəri Rəşad Məcid görüşün Mediada İnnovativ Təşəbbüslərə Dəstək İctimai Birliyi (MİTDİB) tərəfindən təşkil edildiyini diqqətə çatdırıb. Məsələnin aktuallığını vurğulayan MŞ sədri bildirib ki, süni intellekt vasitələrindən daha səmərəli yararlanmaq və bu texnologiyanın mətbuat sahəsində yaratdığı yeni çağırışları düzgün qiymətləndirmək üçün belə müzakirələrin təşkili böyük əhəmiyyət kəsb edir.

MİTDİB sədri, media mütəxəssisi Müşfiq Ələsgərli çıxışında tədbirin “Süni intellektin mediaya təsirləri: fürsətlər və risklər” layihəsi çərçivəsində baş tutduğunu qeyd edib. Təşəbbüsün maliyyə dəstəkçisi Qeyri-Hökumət Təşkilatlarına Dövlət Dəstəyi Agentliyidir.

M.Ələsgərli əlavə edib ki, proqramın əsas qayəsi generativ süni intellekt (AI) sistemlərinin kütləvi informasiya vasitələrinə müsbət və mənfi təsirlərini, həmçinin bu innovasiyalardan effektiv istifadəyə dair beynəlxalq nəzəri yanaşmaları öyrənməkdir. Tədqiqatların yekununda məlumat bazası yaradılaraq yerli auditoriyanın ixtiyarına verilib: “Təşəbbüs çərçivəsində AI-nin mətbuatda uğurlu tətbiqi ilə bağlı xarici akademik mərkəzlərin irəli sürdüyü müasir elmi konsepsiyalar araşdırılaraq ümumiləşdirilib. Təhlillərin nəticələri 12 məqalə formasında hazırlanaraq müxtəlif KİV-lərdə işıqlandırılıb”.

Layihə rəhbəri yerli mətbuatda süni intellektdən istifadənin mənəvi və peşə standartlarının müəyyənləşdirilməsi istiqamətində addımların artdığını vurğulayıb. Bu baxımdan bəzi KİV-lərdə redaksiya daxili AI qaydalarını əks etdirən xüsusi sənədlərin tərtibinə start verilib: “Mən ‘Xalq qəzeti’ndə hazırlanan davranış kodeksi ilə tanış olmuşam. Baş redaktor Əflatun Amaşovun rəhbərliyi ilə ərsəyə gələn bu sənəd qabaqcıl dünya təcrübəsinə söykənir. Düşünürəm ki, bu cür addımların digər mətbuat orqanlarında da tətbiqi faydalı olardı”.

Layihənin eksperti, “Report” İA-nın əməkdaşı Araz Zeynalov bildirib ki, görülən işlər çərçivəsində süni intellektin mətbuatda yarada biləcəyi təhlükələrin neytrallaşdırılması istiqamətində beynəlxalq addımlar və aidiyyəti qurumların tövsiyələri də təhlil olunub: “Bu çərçivədə UNESCO-nun ‘Süni intellekt etikası üzrə Tövsiyəsi’, Avropa İttifaqının ‘Süni intellekt aktı’, eləcə də beynəlxalq jurnalist təşkilatlarının qəbul etdiyi ‘Süni intellekt və jurnalistika üzrə Beynəlxalq Xartiya’nın əsas prinsipləri öyrənilib və yerli oxuculara təqdim edilib”.

A.Zeynalov mövzu ilə bağlı iki podkastın da hazırlanaraq sosial platformalarda yerləşdirildiyini sözlərinə əlavə edib.

Konfransda Demokratik Jurnalistlər Liqasının rəhbəri Yadigar Məmmədli, Milli QHT Forumunun İdarə Heyətinin üzvü Zaur İbrahimli, “Türküstan” qəzetinin baş redaktoru Aqil Camal, “Aznews” xəbər saytının baş redaktoru Taleh Şahsuvarov, CASCFEN sədri Nadir Azəri, QHT.az portalının baş redaktoru Cəsarət Hüseynzadə, “Mətbuat.az” xəbər saytının baş redaktoru Ramil Mirzəyev və digər qonaqlar fikir mübadiləsi aparıblar.

Çıxışçılar milli mətbuatda AI texnologiyalarından etik, məsuliyyətli və səmərəli istifadə vərdişlərinin formalaşdırılması, redaksiyalarda bu alətlərdən istifadəyə dair korporativ qaydaların işlənməsi, habelə jurnalistlərin yeni texnoloji imkanlar və olası risklər haqqında maarifləndirilməsinin vacibliyini diqqətə çatdırıblar.