Səudiyyə Ərəbistanının müdafiə naziri, şahzadə Xalid bin Salman NATO-nun baş katibi Mark Rütte ilə telefon danışığı aparıb. 

Xəbər Experti xəbər verir ki, tərəflər hərbi və müdafiə sahələrində əməkdaşlığı, eləcə də regionda davam edən hadisələrə cavab olaraq səylərin əlaqələndirilməsini müzakirə ediblər.

Telefon danışığı zamanı tərəflər regiondakı mövcud vəziyyətlə bağlı birgə koordinasiya məsələlərini nəzərdən keçirib, regional və beynəlxalq təhlükəsizlik və sabitliyin dəstəklənməsinə xüsusi diqqət yetiriblər.

Xalid bin Salman və Mark Rütte, həmçinin qarşılıqlı maraq doğuran bir sıra məsələlər ətrafında fikir mübadiləsi aparıblar.

Bundan əlavə, Səudiyyə Ərəbistanının müdafiə naziri Kanadanın müdafiə naziri Devid Makginti, Almaniyanın müdafiə naziri Boris Pistorius və İspaniyanın müdafiə naziri Marqarita Robles ilə də telefon danışığı aparıb. Müzakirələr Səudiyyə Ərəbistanına qarşı husilərin pislənilən hücumları fonunda regionda baş verən hadisələrə həsr olunub.

Danışıqlarda regional proseslərə cavab olaraq Səudiyyə Ərəbistanı ilə adıçəkilən üç ölkə arasında səylərin əlaqələndirilməsi, habelə regionda təhlükəsizlik və sabitliyin təmin olunması üçün birgə fəaliyyətin gücləndirilməsi imkanları müzakirə edilib.

Şahzadə Xalid kanadalı, almaniyalı və ispaniyalı həmkarları ilə ikitərəfli hərbi və müdafiə əlaqələrini, o cümlədən əməkdaşlığın daha da inkişaf etdirilməsi imkanlarını da nəzərdən keçirib.

Devid Makginti ilə söhbəti zamanı Xalid bin Salman Kanadanın Alberta əyalətindəki hərbi bazada baş vermiş yanğın nəticəsində bir neçə hərbi qulluqçunun həlak olması ilə əlaqədar başsağlığı verib.