Səudiyyə Ərəbistanı Krallığı, Pakistan İslam Respublikası və Türkiyə Respublikası bu gün Ər-Riyadda Məkkə Müdafiə Alyansının Strateji Siyasi və Müdafiə Komitəsinin fövqəladə iclasını keçirib. 

Xəbər Experti xəbər verir ki, iclasda Səudiyyə Ərəbistanı Krallığının üzləşdiyi təhlükəsizlik vəziyyəti və təhdidlər müzakirə olunub.

Məkkə Müdafiə Alyansının institusional çərçivəsinə uyğun olaraq komitə Pakistanın istefada olan general-leytenantı Noman Mahmudun üç il müddətinə Alyansın ilk baş katibi təyin olunması barədə qərar qəbul edib.

Üzv dövlətlər Noman Mahmudun təyinatını alqışlayıb, ona vəzifəsinin icrasında uğurlar arzulayıb və Alyansın inkişafına, eləcə də qarşıya qoyulan məqsədlərə nail olunmasına töhfə verəcəyinə əminliklərini ifadə ediblər.

Üzv dövlətlər Məkkə və Mədinənin hədəfə alınması cəhdlərini, həmçinin Səudiyyə Ərəbistanında şəhərlərə, mülki və iqtisadi obyektlərə qarşı davam edən hücumları ən sərt şəkildə pisləyib. Onlar Krallığın təhlükəsizliyinə və ərazi bütövlüyünə qarşı hər hansı təcavüzü və ya təhdidi qəti şəkildə rədd etdiklərini bildiriblər.

Pakistan və Türkiyə Səudiyyə Ərəbistanı Silahlı Qüvvələrinin sayıqlığını və hazırlıq səviyyəsini, habelə Krallığa qarşı təhdid və hücumların qarşısının alınması, onun təhlükəsizliyinin və ərazi bütövlüyünün qorunması zamanı nümayiş etdirdikləri peşəkarlıq və səmərəliliyi yüksək qiymətləndiriblər.

Komitə iclasdan əvvəl keçirilmiş siyasi və hərbi məsləhətləşmələrin nəticələrini nəzərdən keçirib və ona təqdim olunan tövsiyələri təsdiqləyib. Bildirilib ki, Məkkə Müdafiə Paktı birgə müdafiəyə möhkəm sadiqliyi və təhdidlər qarşısında vahid mövqeni təcəssüm etdirir.

Komitə birgə müdafiə öhdəliklərinin praktiki icrasına dərhal başlanılması, razılaşdırılmış qüvvə və hərbi imkanların təmin edilməsi və onların təsdiq edilmiş razılaşmalara, eləcə də üzv dövlətlərin milli qanunvericiliyinə uyğun olaraq Krallıq ərazisində yerləşdirilməsinin sürətləndirilməsi üçün zəruri tədbirlərin görülməsi barədə qərar qəbul edib. Bununla hərbi hazırlığın və inteqrasiyanın, həmçinin təhdidlərə qarşı mübarizə və onların dəf edilməsi istiqamətində kollektiv imkanların gücləndirilməsi nəzərdə tutulur.

Tərəf dövlətlər bəyan ediblər ki, hər bir üzv dövlətin təhlükəsizliyi üç dövlətin kollektiv təhlükəsizliyinin ayrılmaz hissəsidir. Onlar vurğulayıblar ki, Məkkə 
Sazişinin praktiki tədbirlərə çevrilməsi birgə müdafiə öhdəliyinin etibarlılığını nümayiş etdirir, çəkindirmə tədbirlərinin effektivliyini artırır və üç dövlətin birliyini, habelə sazişin müddəalarına uyğun olaraq təhlükəsizliklərini, suverenliklərini və ərazi bütövlüklərini müdafiə etmək əzmini təsdiqləyir.